I lavutslippssamfunnet er klimaspora som kvar nordmann etterlèt seg heilt nede på 1,5 tonn CO2 per år. Er det mogleg?
Denne futuristiske filmen skildrar korleis samfunnet vårt kan sjå ut i 2050. Sjølvkøyrande bilar som blir lada opp på vegen og ein transportsektor som er heilt utsleppsfri. Dei fleste bygningar vil kunne produsere meir energi enn dei bruker, slik at dei leverer straum tilbake til straumnettet. Dette kan bli kvardagen til Noregs befolkning innan 2050.
På spørsmål om kva lavutslippssamfunnet kan innebere for folk flest, svarar fagdirektør Are Lindegaard i Klimaavdelinga hos Miljødirektoratet: «I eit lavutslippssamfunn bur vi i sykkel- og gangavstand til mykje meir av det vi treng i kvardagen – skular, barnehagar, butikkar, grøntområde og parkar. Og ikkje minst har vi kort avstand til eit godt kollektivtilbod. På middagsbordet er ein del av vekas kjøtmåltid erstatta med fisk og mykje grønsaker. Når vi brukar bil er den utsleppsfri, og vi deler den med fleire. Vi brukar mykje mindre energi til oppvarming og elektrisitet i bustaden vår, og energien vi brukar er fornybar. Varene vi kjøper – syklar, vaskemaskiner, møblar, byggemateriale, sko, klede og delar til ulike produkt – er produsert med langt mindre energi, og den er fornybar. Prosessane for produksjon av varene nyttar teknologi som har minimale eller ingen klimagassutslepp. Og vi resirkulerer og gjenbruker kvar minste ting som kan brukast på nytt. Det krev ei stor omstilling for å nå lavutslippssamfunnet, men når vi først er der, vil vi neppe ønskje oss tilbake til fortida anno 2015.»
Kjelde: Miljødirektoratet/NRK